جنبي اليمين والا الشمال
يا مشرط الجراح نويت
اسفة على هذا السؤال
مش خايفة اموت
خايفة ان حييت
راح اموت انا على كل حال
يمكن اكون بيك انتهيت
افتح شوية شمال كده
قلبي ضلوعه مضعضعة
اقلع جدور شجرة غرام
مغروسة فيه ومفرّعة
يمكن يخف من الالام
دانا م الغرام متوجّعة
اطرح حياتي م العذاب
وان فاض لي باقي اجمعه
على ذكرى حلوة من الشباب
ف العمر لسّه مسمّعة
يمكن تداوي قلب داب
م الحب عينه مدمّعة
يا مشرط الجراح خلاص
الروح اهي طارت هناك
اتاريني بحيا بالغرام
وامّا نزعته قلبي مات
روحي يا طايرة مرفرفة
سابقة حدود المعرفة
مشتاقة للزمن اللي فات
والا سعيد ة بالصفا
فايته وراكي الذكريات
وفراغ ف احضان الدفا
وقلوب ملانة بالاهات
وعقول تتوه ف الفلسفة
مش باقي منك غير كلام
مكتوب على شوية ورق
لو تقروا على روحي السلام
تلقوا كلامي بنور شرق
وتحية مني ف الختام
وسبّحوا معبود خلق
..
0 التعليقات:
إرسال تعليق