اخرتها .......... بقلم الشاعر......صلاح البرماوي

أخرتها ايه يابلد)*
*************
مش كفاية عذاب 
مش كفاية شهدا من غير أسباب
شايف الواد راجع بيته بعد غياب
مشتاق يتجمع مع الاصحاب
قابله غدر من الارهاب
راح الواد فى غمضة عين
صرخت أمه من غير دمعة تملى العين
قالت ابنى ضنايا فين
جاى من غربته قتلوه
فى غمضة عين
ايه اللى عملوا الولد
أخرتها ايه يابلد
*************
قولولى أجيبه منين
ابنى خلاص اتقتل
الدور اللى جاى على مين
فين الرحمة راحت فين
كنا زمان عايشين أخين
مهما كانت فرقة دين
كلنا نعبد رب الدين
ولا كنا بنسال ده ابن مين
اليوم أصبح حاجة غريبة
فرقة عجيبة............
حتى الفرقة بين الأصحاب
مابقاش فيها حتى عتاب
وبقينا على بعض نغتاب
فين الرحمة ؟؟؟؟؟
وتقولوا لينا أهل كتاب
ولدى راح وياريته اتصاب
فين الضحكة راحت فين
كانت تملى عليا الدار
راحت فيــــــــــــــــن
غدرك طالنى ياارهاب
ابنى فى جنة الرحمن
قلبى معاك ياولد
قولولى اخرتها ايه يابلد
***************************
شوفوا كام قلب أم حزين
بعد ماشافت القناصين
قتلوا الفرحة فى غمضة عين
كفاية حرام ....................
امتى الناس هاتعيش فى أمان
امتى هاحس ان أنا انسان
نفسى صوتى يرن فى كل مكان
عاوز أعيش.... أنا انسان
افهم !!! ياللى انت جبان
سيبنى أعيش أيامى فرحان
ولاعليك أنا صعبان
تشوف البسمة على الخدين
طيب قولى أخرك ايه
فاكر انها هادوم ليك
حاسب نفسك............
أوعى الدنيا تغرر بيك
ولا تكون فاكر هاتخلد
بكرة هاييجى الدور عليك
أصل الدنيا دى دوارة
بكرة تدوق طعم المرارة
اصحى وفوق وكفاية عليك
ربك عالم بيا وبيك
خلى بلدنا تفرح بيك
لما التوبة تملى عنيك
اعمل أخرة ليك ياولد
أخرتها ايه يابلد