شارع فاضي ...... بقلم الشاعر : ناجي الجندي

شارع فاضى
*********
ماشى ومش عارف على فين .... هادى وجوَّايا مش هادى
نزلت مِنِّى دموع العين ..... عادى مادام الشارع فاضى
مين هايشوفنى ؟ مَحَدِّش ماشى ..
مين عارف إذا كنت بآسى ؟
قلبى صحيح والع ف ضلوعى ... وعنيَّا ماليَّاها دموعى
بس مافيش واحد يواسينى ... فين ألقاه والشارع فاضى ؟
شارع كان فى بدايته النور ... خطوَّة بخطوَّة لقيته متاهة
ضلمة وعتمة بقا مهجور .... خافت مِنّهُ الناس وخُطاها
يشبه قلبى فى إللى جراله ....ضاعت مِنّهُ كل آماله
هَجَرُه الفرح وفات أيامه ....للأحزان ودموع وَيّاها
سامع صوت خَطوِّتى وأنا ماشى ...أرض الشارع دى حَضنّاها
حاسس بِيَّا وأنا إحساسى .... كأنُه ماصَدَّق إنّهُ لَقاها
سهل عَليّا أحس حنينُه ..... صعب أجيبلُّه إللى مِفارقينُه
زى ما صعب قلبى أعينُه .... على أحزان عايش جوَّاها
دمعى بينزل مش على خدى ... على قلبى أنا دمعى بِسيل
شارع فاضى مشيتُه لوحدى .... هوَّ طريقى مالوهش بديل
يمكن أوصل مِنُّه لفرحى ... أو فى نهايتُه أرتاح من جرحى
بعدى الناس فيه ترجع تمشى .... وهوَّ كمان يفرح بلقاها
مين هايشوفنى ؟ محدِّش ماشى
مين عارف لو كنت بآسِى ؟
قلبى صحيح والع ف ضلوعى ... وعنيَّا ماليَّاها دموعى
بس مافيش واحد يواسينى ... فين ألقاه والشارع فاضى ؟
(ناجى الجندى )