مش لاقى حاجه اعملها
أجمل أيام عمرى بتتسرق
كل يوم الإسم فى مدرسة
فيس بوك ع الفون
ودروس من العصر لحد المسا
لا فى هواية ولا حتى رياضة ممكنة
وآخر المتمة الترم شهر ونص بقى
وبشرونا....قال هينجحونا
انتوا يلى اسمكوا بتربونا
مش كنتوا قبلا يعنى تعلمونا
يا فرحتى ناجح
وأنا جاهل مع مرتبة الشرف
والمناهج قصقصوها
كترخيرهم بيعاملونا بترف
والثقافة كلمة اسمعها ودنى توش
أو باين اسم قناة شوفت اسمها ع الدش
أو كلمتين منشيين اسرقهم
وع الفيس انشرهم وش
مش عارف بضحك على نفسى
ولا مين بغش
من الطفولة وحلم البطولة والوطنية
وأفلام حرب 73 الى هيه
قالولنا جيبنالكوا السلام
ورونا هتعملوا إيه فى حياتكم ديا
إدونا فرصة بس يا ريت تكون حقيقية
وانتوا تشوفوا النجاح والانجاز
وهنعدى بالبلد ديا
يلى جبتوا السلام والفساد والبطالة
بافكاركوا العجوزة
الشباب من جيلين أعدين عطالة
ولما اعترض إديتوه بين عينيه رصاصةكان نفسه يعيش
كان محتاج يكون
شوفته خلعت حلمى
وسبته جنب الحيط مركون
خايف بيرتعش مليان يأس و هموم
لكن عنده امل انه فى يوم يكون
مستنى يوم يشوف الشمس ويخلف الظنون
نفسى فى يوم يكون..نفسى
محتاج اكون
جدا محتاج اكون
................................................
يوم ورا يوم ملل قرف زهق
مش لاقية حاجه أعملها
اجمل ايام عمرى بتتسرق
كل يوم نصايح كتير ملهاش عدد
متلبسيش متقوليش متخرجيش
كونى بنت أنا كمالة عدد
حمل وهم وعار
نظراتهم وكلامهم خلى دمى فار
والشهادة سلاح وعليها هدية عريس مختار
منين ما أروح محسسنى إنى عوالة
ناقصة مصلحش غير انى اكون طباخة
محبوسة فى الكعب العالى
والميك أب والفيست والتوب
انام واقوم وأنا أعدة ع اللاب توب
علاقتى بالحياه إنى بتفرج عليها
مسروق منى أى حق فيها
عالم ذكورى واتسجنت أنا فيه
مفروضة عليا حياتى
موئودة أحلامى مش عارفه ليه
من الطفولة وحلم البالية بعد تحية العلم فى الطابور
قلولنا البنت زى الولد صابنا الغرور
البنات خرجوا ولبسوا البنطلون
وقالوا يا حقوق يا حريه
إلى اتسحلت والى إتعرت
وإلى فى السجن مرمية
وإلى دمها سايل ع الارض
والخلق عليها بتجرى مذعورة معديه
كان نفسها تعيش
كانت محتاجه تكون
شوفتها خلعت حلمى
وسبته جنب الحيط مركون
خايف بيرتعش مليان يأس و هموم
لكن عنده امل إنه فى يوم يكون
مستنى يوم يشوف الشمس ويخلف الظنون
نفسى فى يوم يكون..نفسى
محتاجه أكون
فعلا محتاجة أكون
يوم ورا يوم ملل قرف زهق
مش لاقين حاجه نعملها
أجمل أيام عمرنا بتتسرق
بنت ....ولد
محتاجين نكون
محتاجين نكون
0 التعليقات:
إرسال تعليق