أنا لسه بسمع ف الصور ..... بقلم : محمد إسماعيل

أنا لسه بسمع فـ الصور
أنا لسه برسم ع الهوا
أنا لسه بجرى فـ المطر
بحلم فـ يوم نبقى سوا
أنا لسه نفس العيلة 
بشبط فـ حاجة وأحبها
تيجى فـ أنسى شكلها
تبعد بعيد أحتاجلها
أنا هى هى نفسها ..
نفس الضفيرة ومريلة
أنا هى هى فـ شكلها
البنت اللى تحبها ..
الفرق بينى وبينها إنى
أحلامى فيك متبدله
بدايتها كت متأجلة
متعجلة
أوصل لها ..
ضيعتها
وحاجات مجتش وقتها
وحاجات بعيدة بحبها
أنا هى نفس المشكلة
وأنا برضو كنت حلها ..
أنا هى هى فـ شكلها
أنا هى هى نفسها
بس إنت جارح قلبها ..