عداد العمر .... بقلم الشاعر : على أبو سراج

عـدّاد العـمــر
مفتتح :
طفّى نجومها و قيد لياليها !!
خليها تبيّـت .. وحديها
و اعمل مقموص ..
اعمل .. زعـلان !!
بكره يا متعوس ..
المخفى يبــان ..
و عيالكم .. تكره .. أهاليهــا !!
***
بيفرّق روحه على اصحابه ..
راضى و فرحان
و يسوق الضحك لأحبابه و ..
يغسل أشجــان
حبـّوب ..
وحنيّن ..
و مـداوى .. و ..
بحريــن احســان !!
و يهلّ الليل ويروح بيته ..
يتقلب الحــال !!
ف يسيب الوش المتبسـّـم ..
على عتبة بابه و ..
يدخـل .. حزنان !!
و يطيح و يزعبب مش طــايق ..
طب مالك ؟! ..
أبدا .. متضــايق !!
مع ان الورده اللى فايتها ..
كنت انت .. أول فرحتها ..
و بتنشف منك ..
و بتدبل ..
و شايفها بعينك ..
و بتقبل !! ..
طب فتّح عينك ..
اتفرج .. !!
دا البيت .. بستــان ..
مزروع بحنــان ..
و ف كل مكان ..
فيه ايد فنّــان ..
البيت يا سلاااااااام ..
متزوّق ..
رايق ..
فتّــان .. !!
و ال " مشنى " بخيــل !!
صوابعها العشره تقيدها له ..
و دا .. ..
أبدا .. قاعد على حاله !!
يبخل بالنّبضه اللى ف قلبه ..
يبخل بالبسمه و يهنى له ..
لو تخفى و يعمل ما بدى له .. !!
و ان يعنى اشتــاق ..
يعمــل .. عشّــاق .. !!
و يروح لمــاعونه بأوحــاله !!
و يكـبّ الكبت بروح مـيّـت ..
ف تبيّـت باكيـه و حزنـانـه ..
تتكلـم ..
ف يقول زنـّـانه ..
و الفـرشه بتصبـح ..
زنزانـه !! ..
طب .. آخر الحاله اللى بيناتكم ؟!
باسرح فى اولادكم .. وبناتكم ..
يقتلنى الهـم !!
اسمعنى يا عم ..
لزمــا .. و لابد ..
تمســك فى الحبل اللى ما بينكم
من رحمـه و ود ..
ما تقولش انه تعقـّـد منّــك ..
و اوضع لك .. حـد ..
عدّاد العمر اللى نسيـته ..
عمّــــال بيعد ..
و الــرّابط بينكم يا قليبى ..
مش ورقه و عقد
_____________
وعلى صفحتى الشخصية المزيد من الأشعار لمن أحب مرايتى