تحت الماصلة ---- بقلم رضا ابو الغيط

تحت المأصله

شيئ ما بينا بينقتل
رقبته تحت المأصله
الخوف قابلنى ف سكتى
شايله ف ايده المغسله
والنعش سادد سكتى
سألته ايه المساله
شفت الدموع
اللى ف عنيه
ومخبى ايه معرفش ليه
حاولت أشوف
أوحتى أبص
لمحت توب أبيض
وبس
لمحت ناس
مش أى ناس
سمعت صوت
مش أى صوت
ده صوت حزين
كله شجون
ودموع تسيل
من غير عيون
حاولت أعدى
حاولت أفوتأتارى كان

مكتوب لى أموت
ومن سكات
من غير عياط
شدت رقابتى المأصله
واتبسمت
من طيبتى أنا
كل العيون ع المغسله
واتلف توب
من بعد توب
وريحه قالوا 
معطره
سامع عويل 
من ناس كتير
سامع كمان
صوت الأدان
وشيخ ضرير
نادى وقال
قيموا الصلاه
واترحموا 
كده من سُكات
سامع كمان 
بعد الأدان
قرآن ف قلب المندره
شايف سواد 
مالى البلاد
وعيون بتبكى
ع الولاد
ولسه بسأل يا ترى
لحقت أتوب
ولا الذنوب متبعتره
ولسه بسأل يا ترىأنا اللى مات

ولا الضمير
هو اللى تحت المأصله

كلمات / رضا أبو الغيط