سنين العمر ........ بقلم الشاعر....... عز رشاد

سنين العمر ()
.....................
---------------------
غريبه الحياه دالوقتى
عدد سنين العمر
فيها بيتحسب باليأس..
محسوب عمرنا فيها
بعدد سنين جراحنا
وفرحه يومين وبس..
والحياه ,,,,,,,,
فيها اللى شعره
شاب من كتر اوجاعه
وفيها اللى تاه
منه الحبيب وسابه
فيها اللى بيمشى
ولا يتعبش ِ من مشاويرة
وفيها اللى بيحبى
وبدل الخطوه ايديه بتشيله
فيها اللى بيجرى
فملكوته ولا لحظه بتفوته
وفيها اللى بيخبى
ع الناس جرحه
جوه قلبه بسكوته
وفيها ناس بتاكل بعضها
ولا حسه بغيرها عايشه لنفسها
يسالوك عمرك اد ايه
تجاوب أهاتك وتقول
لو عرفتوا احسبوه وقولولى عليه
من كتر أحزانى تاه الرقم منى
والدمع اللى ف عينى
سرق العمر منى
وموت فيا الاحساس
غريبه الحياه دالوقتى
عدد سنين العمر
فيها بيتحسب باليأس..